Mocedá d'Izquierda Asturiana anuncia la so disolución como estaya xuvenil vinculada a Izquierda Asturiana

23/01/2008 >> La organización xuvenil mias>> -Mocedá d'Izquierda Asturiana-, aconceyada la so militancia na IV Asamblea Xeneral, cellebrada'l pasáu sábadu 19 de xineru de 2008 n'Uviéu, decidió por UNANIMIDÁ, dempués d'un llargu discutiniu nos últimos meses, anunciar el fin de la so actividá nel marcu d'actuación del partíu Izquierda Asturiana disolviéndose como organización, figura qu'apaez contemplada nos estatutos fundacionales del colectivu.

Los motivos que lleven a les y los militantes de mias>> a tomar esta decisión, murnia en tolos sentíos, tan xeneraos por discrepancies cola estratexa política que vien aprobando Izquierda Asturiana nos últimos tiempos, que provocaron una falta de sintonía ente les propuestes que salíen dende la estaya moza y les resoluciones de los Alcuentros Nacionales d'Izquierda Asturiana.

mias>>, poro, considerando non viable'l so propiu proyectu d'esistencia nesti marcu d'actuación, opónse asina, claramente, a convertise nun pilancu nel procesu d'apueste estratéxicu d'Izquierda Asturiana -la coalición Unidá- que ponga torgues al mesmu, condicionando la so dinámica de trabayu y discutiniu, y dexando llibre'l camín a IAS nel ámbetu de la mocedá.

Asinamesmo, los y les militantes de mias>> quieren facer anuncia, tamién, del so rechazu a abandonar la vida política asturiana activa y la defensa de los principios y finxos ideolóxicos que, según les bases fundacionales d'Izquierda Asturiana y, dende va casi trés años, vienen defendiendo ente la mocedá pa la consecución d'una Asturies sostenible col mediu ambiente, xusta socialmente y llibre, polo que nes próximes selmanes perfilarán y presentarán un nuevu espaciu asociativu que seya plataforma dende la que siguir lluchando por da-y otra traza a esti País.

Pa finar, los y les militantes de mias>> quieren esclariar qu'esta decisión nun guarda rellación dala cola xusta decisión tomada por Izquierda Asturiana na espulsión del conceyal Jose Ángel García "Allende" de Piloña, fechu que cuntó col respaldu total de la organización de mocedá.

mias>> quier agradecer fondamente l'apoyu de munches persones y militantes d'Izquierda Asturiana nestos años de trabayu, y espera que, de xuru, vengan tiempos meyores p'Asturies y les persones que siguen defendiendo esta nación dende los movimientos políticos, sociales y asociativos, asina como nel día a día individual.

Siguir lluchando ye'l nuestru camín.

¡PUXA ASTURIES LLIBRE!
¡PUXA MIAS!

Mientres entá resuenen nos nuestros oyíos les apavoriantes estadístiques onde, esti añu, 19.000 moces y mozos tuvieron que salir d'Asturies -con titulaciones y ensin elles- pa vivir d'una manera menos indigna que nesti País (y trabayando) el presidente Vicente facía un actu cola mocedá (la suya, evidentemente, les "Juventudes Socialistas") en La Pola Llaviana.

Nel actu en custión, nel que per parte del presidente nun se menta nin siquiera una sola vegada la problemática de la emigración xuvenil, (yá se sabe, lleendes urbanes, fabulaciones y rumoroloxía) Tini Areces pretende facenos creer la bona situación na que nos topamos les moces y mozos: un nivel educativu altu, accesu a la vivienda amañosu y trabayu en cantidá.

Ye más, nesti puntu del desempléu, el presidente Vicente permítese'l luxu d'afitase como "perfeutu conocedor de los desaxustes nes bolses de desemplegu porque hai desaxustes na formación", colo que vuelve a XUSTIFICAR l'éxodu de la mocedá, vinculándolu a "movilidá llaboral por razones de tipu formativu".

Dende www.asturianoscontraareces.com invitamos otra vuelta más al presidente Vicente Álvarez Areces a que dea un paséu peles estaciones de tren y autobuses los domingos pela tarde a l'altura de los andendes y plataformes de salida a Madrid o Barcelona y que tome datos de la media d'edá de la xente que cola d'Asturies.

Pero claro, siempre sedrá más fácil viaxar n'avión o nún Volkswagen Phartón.

Cola izquierda plural...emigramos igual!!!

El presidente Areces, siempre tan atentu pa con tolos votantes ciudadanos asturianos, tuvo esti día un recuerdu pa los "asturianos nel mundu" nel so blog.

Nel so mensaxe, amás d'amosar una habilidá almirable na prosa poética, Tini Areces diríxese a los asturianos de la emigración, nel tonu amable y cercanu que lu caracteriza, p'afitase nos sos compromisos con esta xente. Ente ellos puen destacase delles iniciatives "loables" como la rede de Centros Asturianos a disposición del presidente pa sumar votos per corréu pa la FSA o l'unvíu d'estremaos regalinos de propaganda institucional, como los cedeses navideños con discursín del presi en pista oculta incluíu. Yá lo vaticina Areces, ¡cuatro años más de congresos y fartures alredor del mundu!

Per otru llau, podemos entruganos si ente esta emigración de la que s'alcuerda Tini con tantu afeutu s'alcuentren los miles de mozos que vienen colando d'Asturies nos últimos años, porque'l presi nun se cansa de repetir que nun esisten, que son lleendes urbanes. Igual dientro de dos o tres lexislatures pasen a engrosar esa "asturianía" nel estranxeru de la que sentinos arguyosos, y tornen a ser oxetivu básicu d'un nuevu presidente populistón.

Esti web de protesta contra la campaña d'autobombu de Tini Areces sofita la candidatura d'UNIDÁ integrada por Izquierda Asturiana, Andecha Astur y Los Verdes-Grupu Verde.

Por una Asturies con xusticia social onde la mocedá nun se vea obligao a emigrar, que defenda la nuesa identidá y cultura propia y que mire pol nuesu mediu ambiente dende los valores del ecoloxismu.

¡¡XUNTOS PODEMOS!!

www.unida.as

El candidatu 'socialista' a la presidencia d'Asturies presentó güei un actu sobre Bientar Social na villa de Salas. Ellí, Tini aprovechó pa facer delles promeses sobre'l mediu rural asturianu, no que cinca a infraestructures de comunicación y nueves tecnoloxíes.

Como davezu, ente palabres guapes y asuntos amables, echóse en falta dalguna referencia a dellos aspeutos de la realidá actual de los nuestros pueblos. Polo visto, si sal reescoyíu como presidente, Areces piensa siguir ensin tomar nenguna midida pa tornar el desaniciu del mediu rural.

Paez que los trabayadores del sector primariu van siguir siendo ignoraos pol Principáu hasta que nun quede nengún, afogaos poles grandes empreses y l'escaezu de les Alministraciones. Al tiempu, la mocedá va siguir marchando énte la falta d'oportunidaes pa vivir nos sos pueblos. Asina, l'aveyamientu y la despoblación van siguir medrando cada vez más, dando llugar a la eliminación de servicios y posibilidaes, reforzando un círculu viciosu que nun faen nada por evitar. Paez qu'al nuestru gobiernu nun-y preocupa que la xente vieyo nun tenga un mélicu cerca o que los neños tengan que llevantase a les cinco la mañana pa llegar per carreteres mal asfaltaes a les escueles de la villa más cercana a les ocho (anque eso sí, con bona conesión a la rede wifi).

La pena más grande ye que los mozos y moces de los pueblos asturianos nun podrán disfrutar de la maraviyosa banda ancha que-yos va ufiertar Areces, en teniendo que colar en miles pa les ciudaes del centru d'Asturies o direutamente fuera del país. Pero de xuru que van tar mui a gustu nesi paraísu conocíu como Ciudá Astur. Y ye qu'equí, xunto a les lleendes urbanes famoses, nun se pue negar la esistencia de miles de lleendes rurales.

Ayeri presentaba la FSA les sos 'propuestes' pal oriente asturianu nun actu celebráu en Les Arriondes. Enllenóse-y la boca al presidente falando de turismu y recursos naturales: sí, too al tiempu. Pero Tini falando de caltener el mediu ambiente ye como Jorge Javier Vázquez defendiendo'l derechu a la privacidá, y más cuando'l discursín de turnu se refier al oriente d'Asturies, onde la especulación y l'esfarrape del paisaxe qu'afecten a tol país son tovía más sangrinos.

L'otru día salía la sentencia del TSXA na que, a instancies de la demanda presentada por Andecha Astur, partíu enxertu na coalición UNIDÁ, anulábase'l Plan Xeneral d'Ordenación Urbana de Llanes perpetráu pol ayuntamientu llaniscu, en manes del PSOE. Un plan vergoñosu que nun ye más qu'una parte del atentáu ecolóxicu que se ta llevando alantre nel conceyu, onde hai proyectaes más de 15.000 viviendes (más que la población actual de Llanes). Pero de xuru que naide nun s'entruga cómo Tini pue tar falando de "usu sostenible del territoriu" una selmana dempués de la sentencia.

Otru asuntu qu'echamos en falta nes palabrines d'Areces ye'l de la llinia d'alta tensión Soto-Penagos, qu'entra pel oriente del país, semando de torretes estremaos conceyos, y contra la que se vien lluchando dende Izquierda Asturiana, tamién parte d'UNIDÁ. Suponemos que la llinia, en tou casu, tamién ta dientro de les midíes pa "caltener los valores naturales y culturales nel estáu de conservación que los cualifica", que suena mui guapo.

Areces sigue no suyo: palabrines fáciles y vacíes y nenguna vergoña poles barbaridaes que vien faciendo'l so gobiernu nestos cuatro años. Cualquier día tendrán que pintar una urbanización en medio del logo del "Paraísu Natural".

D'inauguración n'inauguración, de convite en convite: asina apura Tini la so axenda diaria a poques selmanes de les eleiciones, baxando'l preciu del fumu en cada frase de los sos discursos. Ún de los actos más sonaos d'estes selmanes foi la inauguración de la rula nueva de Candás, qu'ocupó delles páxines nos principales periódicos asturianos (al tiempu que ninguneaben la presencia d'estremaes organizaciones qu'aprovecharon la ocasión pa recorda-y al presidente dalgunes de les sos actuaciones llamentables).

Lo que nun atopó tantu güecu nes fueyes de la prensa foi la noticia, malpenes una selmana dempués de la inauguración, de que la rula tovía nun ta en serviciu, porque ainda necesita delles igües (!) y remates enantes d'entamar a furrular, amás de la instalación del moblame... sicasí, por desgracia p'Areces, nestos tiempos too acaba sabiéndose y espardiéndose, por muncho que'l nuestru presidente siga pretendiendo tomanos por tontos. En Candás yá deben conocelu bien.

Rexistren www.asturianoscontraareces.com como ferramienta pa denunciar los problemes que carez la mocedá asturiano frente al autobombu del presidente Areces.

La organización de mocedá arreyada al partíu Izquierda Asturiana, enxertáu na coalición UNIDÁ, amuesa'l so plasmu y repulsa énte una nueva aición propagandística y electoral encubierta del PSOE y de Tini Areces, una práctica que vien siendo yá habitual nos últimos meses, cola presentación de la supuesta iniciativa ciudadana “Asturianos por Areces”.