Ayeri presentaba la FSA les sos 'propuestes' pal oriente asturianu nun actu celebráu en Les Arriondes. Enllenóse-y la boca al presidente falando de turismu y recursos naturales: sí, too al tiempu. Pero Tini falando de caltener el mediu ambiente ye como Jorge Javier Vázquez defendiendo'l derechu a la privacidá, y más cuando'l discursín de turnu se refier al oriente d'Asturies, onde la especulación y l'esfarrape del paisaxe qu'afecten a tol país son tovía más sangrinos.

L'otru día salía la sentencia del TSXA na que, a instancies de la demanda presentada por Andecha Astur, partíu enxertu na coalición UNIDÁ, anulábase'l Plan Xeneral d'Ordenación Urbana de Llanes perpetráu pol ayuntamientu llaniscu, en manes del PSOE. Un plan vergoñosu que nun ye más qu'una parte del atentáu ecolóxicu que se ta llevando alantre nel conceyu, onde hai proyectaes más de 15.000 viviendes (más que la población actual de Llanes). Pero de xuru que naide nun s'entruga cómo Tini pue tar falando de "usu sostenible del territoriu" una selmana dempués de la sentencia.

Otru asuntu qu'echamos en falta nes palabrines d'Areces ye'l de la llinia d'alta tensión Soto-Penagos, qu'entra pel oriente del país, semando de torretes estremaos conceyos, y contra la que se vien lluchando dende Izquierda Asturiana, tamién parte d'UNIDÁ. Suponemos que la llinia, en tou casu, tamién ta dientro de les midíes pa "caltener los valores naturales y culturales nel estáu de conservación que los cualifica", que suena mui guapo.

Areces sigue no suyo: palabrines fáciles y vacíes y nenguna vergoña poles barbaridaes que vien faciendo'l so gobiernu nestos cuatro años. Cualquier día tendrán que pintar una urbanización en medio del logo del "Paraísu Natural".