23/01/2008 >> La organización xuvenil mias>> -Mocedá d'Izquierda Asturiana-, aconceyada la so militancia na IV Asamblea Xeneral, cellebrada'l pasáu sábadu 19 de xineru de 2008 n'Uviéu, decidió por UNANIMIDÁ, dempués d'un llargu discutiniu nos últimos meses, anunciar el fin de la so actividá nel marcu d'actuación del partíu Izquierda Asturiana disolviéndose como organización, figura qu'apaez contemplada nos estatutos fundacionales del colectivu.

Los motivos que lleven a les y los militantes de mias>> a tomar esta decisión, murnia en tolos sentíos, tan xeneraos por discrepancies cola estratexa política que vien aprobando Izquierda Asturiana nos últimos tiempos, que provocaron una falta de sintonía ente les propuestes que salíen dende la estaya moza y les resoluciones de los Alcuentros Nacionales d'Izquierda Asturiana.

mias>>, poro, considerando non viable'l so propiu proyectu d'esistencia nesti marcu d'actuación, opónse asina, claramente, a convertise nun pilancu nel procesu d'apueste estratéxicu d'Izquierda Asturiana -la coalición Unidá- que ponga torgues al mesmu, condicionando la so dinámica de trabayu y discutiniu, y dexando llibre'l camín a IAS nel ámbetu de la mocedá.

Asinamesmo, los y les militantes de mias>> quieren facer anuncia, tamién, del so rechazu a abandonar la vida política asturiana activa y la defensa de los principios y finxos ideolóxicos que, según les bases fundacionales d'Izquierda Asturiana y, dende va casi trés años, vienen defendiendo ente la mocedá pa la consecución d'una Asturies sostenible col mediu ambiente, xusta socialmente y llibre, polo que nes próximes selmanes perfilarán y presentarán un nuevu espaciu asociativu que seya plataforma dende la que siguir lluchando por da-y otra traza a esti País.

Pa finar, los y les militantes de mias>> quieren esclariar qu'esta decisión nun guarda rellación dala cola xusta decisión tomada por Izquierda Asturiana na espulsión del conceyal Jose Ángel García "Allende" de Piloña, fechu que cuntó col respaldu total de la organización de mocedá.

mias>> quier agradecer fondamente l'apoyu de munches persones y militantes d'Izquierda Asturiana nestos años de trabayu, y espera que, de xuru, vengan tiempos meyores p'Asturies y les persones que siguen defendiendo esta nación dende los movimientos políticos, sociales y asociativos, asina como nel día a día individual.

Siguir lluchando ye'l nuestru camín.

¡PUXA ASTURIES LLIBRE!
¡PUXA MIAS!

Comments

Nel actu en custión, nel que per parte del presidente nun se menta nin siquiera una sola vegada la problemática de la emigración xuvenil, (yá se sabe, lleendes urbanes, fabulaciones y rumoroloxía) Tini Areces pretende facenos creer la bona situación na que nos topamos les moces y mozos: un nivel educativu altu, accesu a la vivienda amañosu y trabayu en cantidá.

Ye más, nesti puntu del desempléu, el presidente Vicente permítese'l luxu d'afitase como "perfeutu conocedor de los desaxustes nes bolses de desemplegu porque hai desaxustes na formación", colo que vuelve a XUSTIFICAR l'éxodu de la mocedá, vinculándolu a "movilidá llaboral por razones de tipu formativu".

Dende www.asturianoscontraareces.com invitamos otra vuelta más al presidente Vicente Álvarez Areces a que dea un paséu peles estaciones de tren y autobuses los domingos pela tarde a l'altura de los andendes y plataformes de salida a Madrid o Barcelona y que tome datos de la media d'edá de la xente que cola d'Asturies.

Pero claro, siempre sedrá más fácil viaxar n'avión o nún Volkswagen Phartón.

Cola izquierda plural...emigramos igual!!!

Comments

Nel so mensaxe, amás d'amosar una habilidá almirable na prosa poética, Tini Areces diríxese a los asturianos de la emigración, nel tonu amable y cercanu que lu caracteriza, p'afitase nos sos compromisos con esta xente. Ente ellos puen destacase delles iniciatives "loables" como la rede de Centros Asturianos a disposición del presidente pa sumar votos per corréu pa la FSA o l'unvíu d'estremaos regalinos de propaganda institucional, como los cedeses navideños con discursín del presi en pista oculta incluíu. Yá lo vaticina Areces, ¡cuatro años más de congresos y fartures alredor del mundu!

Per otru llau, podemos entruganos si ente esta emigración de la que s'alcuerda Tini con tantu afeutu s'alcuentren los miles de mozos que vienen colando d'Asturies nos últimos años, porque'l presi nun se cansa de repetir que nun esisten, que son lleendes urbanes. Igual dientro de dos o tres lexislatures pasen a engrosar esa "asturianía" nel estranxeru de la que sentinos arguyosos, y tornen a ser oxetivu básicu d'un nuevu presidente populistón.

Comments

Por una Asturies con xusticia social onde la mocedá nun se vea obligao a emigrar, que defenda la nuesa identidá y cultura propia y que mire pol nuesu mediu ambiente dende los valores del ecoloxismu.

¡¡XUNTOS PODEMOS!!

www.unida.as

Comments

Como davezu, ente palabres guapes y asuntos amables, echóse en falta dalguna referencia a dellos aspeutos de la realidá actual de los nuestros pueblos. Polo visto, si sal reescoyíu como presidente, Areces piensa siguir ensin tomar nenguna midida pa tornar el desaniciu del mediu rural.

Paez que los trabayadores del sector primariu van siguir siendo ignoraos pol Principáu hasta que nun quede nengún, afogaos poles grandes empreses y l'escaezu de les Alministraciones. Al tiempu, la mocedá va siguir marchando énte la falta d'oportunidaes pa vivir nos sos pueblos. Asina, l'aveyamientu y la despoblación van siguir medrando cada vez más, dando llugar a la eliminación de servicios y posibilidaes, reforzando un círculu viciosu que nun faen nada por evitar. Paez qu'al nuestru gobiernu nun-y preocupa que la xente vieyo nun tenga un mélicu cerca o que los neños tengan que llevantase a les cinco la mañana pa llegar per carreteres mal asfaltaes a les escueles de la villa más cercana a les ocho (anque eso sí, con bona conesión a la rede wifi).

La pena más grande ye que los mozos y moces de los pueblos asturianos nun podrán disfrutar de la maraviyosa banda ancha que-yos va ufiertar Areces, en teniendo que colar en miles pa les ciudaes del centru d'Asturies o direutamente fuera del país. Pero de xuru que van tar mui a gustu nesi paraísu conocíu como Ciudá Astur. Y ye qu'equí, xunto a les lleendes urbanes famoses, nun se pue negar la esistencia de miles de lleendes rurales.

Comments

L'otru día salía la sentencia del TSXA na que, a instancies de la demanda presentada por Andecha Astur, partíu enxertu na coalición UNIDÁ, anulábase'l Plan Xeneral d'Ordenación Urbana de Llanes perpetráu pol ayuntamientu llaniscu, en manes del PSOE. Un plan vergoñosu que nun ye más qu'una parte del atentáu ecolóxicu que se ta llevando alantre nel conceyu, onde hai proyectaes más de 15.000 viviendes (más que la población actual de Llanes). Pero de xuru que naide nun s'entruga cómo Tini pue tar falando de "usu sostenible del territoriu" una selmana dempués de la sentencia.

Otru asuntu qu'echamos en falta nes palabrines d'Areces ye'l de la llinia d'alta tensión Soto-Penagos, qu'entra pel oriente del país, semando de torretes estremaos conceyos, y contra la que se vien lluchando dende Izquierda Asturiana, tamién parte d'UNIDÁ. Suponemos que la llinia, en tou casu, tamién ta dientro de les midíes pa "caltener los valores naturales y culturales nel estáu de conservación que los cualifica", que suena mui guapo.

Areces sigue no suyo: palabrines fáciles y vacíes y nenguna vergoña poles barbaridaes que vien faciendo'l so gobiernu nestos cuatro años. Cualquier día tendrán que pintar una urbanización en medio del logo del "Paraísu Natural".

Comments

Lo que nun atopó tantu güecu nes fueyes de la prensa foi la noticia, malpenes una selmana dempués de la inauguración, de que la rula tovía nun ta en serviciu, porque ainda necesita delles igües (!) y remates enantes d'entamar a furrular, amás de la instalación del moblame... sicasí, por desgracia p'Areces, nestos tiempos too acaba sabiéndose y espardiéndose, por muncho que'l nuestru presidente siga pretendiendo tomanos por tontos. En Candás yá deben conocelu bien.

Comments

Comments

Rexistren www.asturianoscontraareces.com como ferramienta pa denunciar los problemes que carez la mocedá asturiano frente al autobombu del presidente Areces.

La organización de mocedá arreyada al partíu Izquierda Asturiana, enxertáu na coalición UNIDÁ, amuesa'l so plasmu y repulsa énte una nueva aición propagandística y electoral encubierta del PSOE y de Tini Areces, una práctica que vien siendo yá habitual nos últimos meses, cola presentación de la supuesta iniciativa ciudadana “Asturianos por Areces”.

Nesta ocasión la campaña céntrase na figura del propiu presidente, Vicente Álvarez Areces, quien asistió personalmente a la presentación oficial el martes 10 d'Asturianos por Areces, que s'autodefine como “un grupu d'asturianos y asturianes que buscaben un cauce pa que cualesquier ciudadanu pudiere falar de tu a tu con Vicente Álvarez Areces”.

Curiosamente, la páxina web que concentra la información sobre la actividá d'esta organización da más la impresión de ser d'una especie de panexíricu qu'inclúi apartaos como un espaciu de semeyes de xente col presidente, amás d'un blog escritu pol propiu Areces, dalgo mui sosprendente pa una asociación independiente como diz ser esta. Amás resulta “chocante” que’l dominiu propiedá de “Asturianos por Areces” www.tiniareces.es seya l’únicu non rexistráu pol Gobiernu del Principáu como sí lo son los d’estensión .com, .org, .net etc.

El secretariu de nueves tecnoloxíes de mias>>, Xuacu Rodríguez, afirmó que “ye inaceptable la continua apaición d'esti tipu d'actos promocionales que pretenden a les clares engañar a la ciudadanía, lo cual amuesa amás el fondu despreciu que tienen los sos responsables pa colos asturianos y asturianes”.

Amás, Rodríguez destacó que “nos paez mui preocupante'l calter d'esaltación de la figura d'Areces que tien el web, nel que se fala del presidente con una grandilocuencia escesiva dafechu, como si d’ún semidios se tratare, dexando de lláu los pergraves problemes que carez Asturies y la so mocedá, que se ve obligao a emigrar forzosamente en decenes de miles tolos años pa vivir dignamente, anque él siga falando de lleendes urbanes, “probablemente la peor nos últimos trenta años pa la xente más moz.”

Ye por ello que dende Mocedá d’Izquierda Asturiana rexistróse’l dominiu en custión www.asturianoscontraareces.com, un sitiu onde recoyer el descontentu de la mocedá pa cola xestión del gobiernu del PSOE-IU d’esti país, dirixida por un presidente que sigue faciendo negación de los nuestros problemes y tomándonos por tontos”, indicó’l representante de mias>>.

Comments

Somos un grupu d'asturianos y asturianes que refugamos dafechu la xestión del presidente Vicente Álvarez Areces n'Asturies: paru y emigración de la mocedá, desaniciu cultural y identitariu y estroza ecolóxica y ambiental. Tamos en www.mias.as

Esti web naz como rempuesta énte l'apaición d'un blog "promocional" del presidente Tini Areces en www.tiniareces.es y que supuestamente venía "promovíu por xente independiente y ciudadanos anónimos".

Porque nun queremos emigrar nin pa formanos nin pa trabayar, porque queremos un país onde se respete la nuestra cultura, llingua y el nuestru mediu ambiente...ASTURIANOS CONTRA ARECES!!

Comments